يوم اني على نيه احسب الناس انا مثلي
لقيته قلبهم حاقد يدور لي على الزله
رمتني طيبتي بالغدر وانا بطيبتي مبلي
اداري ضحكة اعدائي واشيل من العنا كله
وادور للخوي عذر واماشيهم مثل ظلي
واعطيهم وفا واخلاص مايلقونه بمله
اسايسهم على كيفي ترى ماهوب من هبلي
واعطيهم ضحكة سنوني وقلبي مابرد غله
يحسبوني انا مسكين مايدرون انا وش لي
اخفي داخل اعماقي كم مليون من عله
كوتني طعنتي بالظهر من اللي احسبه خلي
يرمي بدربي اشواك يقول لي زهره وفله
يقول لي فدوتك عيني من الاحقاد يدفن لي
يظهر ضحكة صفراء يبي يبرد بها غله
يصب لي قهوة مره بالفنجال يقدم لي
يدس السم في ماها يدس السم بالدله
اجل وين العرب راحوا طبايعم توقد لي
اجل ماتت عوايدهم ياهوه اصحى من الغفله
انا راسي شمخ عزه من اللي يدوره ذلي
انا كلي شموخ وعز و راسي ينعرف اصله
تراه فراقكم مقدور واقول يانجمتي علي
نجومك ياسما بعيده ولمس الشمس مو سهله
حياتي ارفعي راسك وخلي حزنك يولي
تراي اصعب من مناهم ويكفي منك الطله
تراه اللي مصبرني حبيبي يابعد كلي
وربي ماأترك عيونه لو ان الناس توقفله
